आमच्या गावी साखरपा (ता. संगमेश्वर, जि. रत्नागिरी) येथे गणपती घोड्यावर बसून येण्याची परंपरा आहे. त्या निमित्ताने...
अश्वारूढ तूं श्रीगणेश येसी
आश्वस्त करण्या भक्तांसी ।।
कर्ता, धर्ता, हर्ताहीं असशी,
स्थैर्य रंग चित् शांती असशी;
दहा दिशांना व्यापून उरसी,
विश्वव्यापी परि बिंदूहीं होसी ।।
अश्वारूढ श्री गजानन येसी।
आश्वस्त करण्या भक्तांसी।।
ज्ञानासह विज्ञान सांगुनी,
भक्तांच्या क्षमता विस्तारुनी;
मूलाधारा आधार होऊनी,
सतर्कतेचा मोदक देसी।।
अश्वारूढ तूं भालचंद्रा येसी।
आश्वस्त करण्या भक्तांसी।।
ऋचा आरत्या सुस्वरात घुमती,
धूप दीप सदुपचार चालती,
मी पण माझें नुरवाया ओंकारा;
चतुर्दशी दिनी विसर्जित होसी ।।
अश्वारूढ तूं लंबोदर येसी ।
आश्वस्त करण्या भक्तांसी।।
साखरपा ग्रामी येसी गणराया;
पंचक्रोशीसी आशीर्वच द्याया,
नदी शिवारें तृप्त कराया,
पुनरपि,
भादव्यात विनायकी अवतरसी।।
अश्वारूढ तूं होऊनी येसी ।
आश्वस्त करण्या भक्तांसी ।।
- अनुजा अजय केतकर(घोड्यावरील गणपतींच्या परंपरेविषयी माहिती देणारा लेख वाचण्यासाठी येथे क्लिक करा.)